Öryggi Auroracoin er tryggt með nokkrum undirstöðuatriðum stórra talna, dulritun upplýsinga og leikjafræði.

 

Persónulegir lyklar og reikningsnúmer:

Hvert reikningsnúmer í veski Auroracoin er bundið svokölluðum persónulegum lykli. Persónulegi lykilinn nýtir dulritunartækni, sem er þeim eiginleikum búin að með lyklinum er hægt að búa til reikningsnúmer, sem eru opinber en ekki er hægt að reikna til baka og komast að því hver persónulegi lykilinn er. Reikningsnúmerin eru því opinber og sýnileg öllum en ekki er hægt að nýta þau nema hafa persónulega lykil reikningsnúmersins til að senda Auroracoin.

 

Persónulegi lykilinn er í raun bara stór tala, 2256 þ.e. tala á bilinu 1 og 1077, (1 með 77 núllum fyrir aftan). Þessi tala er það stór að hún nálgast fjölda atóma í sólinni eða fjölda allra stjarnanna á himninum. Það verkefni að giska á einhvern persónulegan lykil einhverra reikningsnúmera er í raun ómöglegt. Auðveldara væri að telja öll sandkornin á jörðinni heldur en að finna einn persónulegan lykil fyrir tilviljun. Því er ógjörningur að komast yfir persónulega lykla þó svo einbeittur vilji sé fyrir því að finna slíka lykla.

 

Dulritunin sem Auroracoin nýtir byggir á þekktri dulritunartækni, “Public- Private key Encryption”, sem er nýtt til að búa til reikningsnúmer. Tæknin nýtir stærðfræðilega eiginleika elipsu fallsins, sem er í raun stærðfræðilegur einstefnuhleri (trapdoor). Hlerinn virkar þannig að sett er inn í elipsu fallið tala, t.d. persónulegi lykillinn og út reiknast önnur tala, reikningsnúmer Auroracoin, sem er háð upphaflega gildinu en ekki er hægt að fara til baka og finna upphaflega gildið. Með þessari aðferð er persónulegi lykillinn notaður til að búa til reikningsnúmer, sem geta verið opinber en enginn getur notað til að komast yfir fjármuni reikningsnúmersins. Einnig eru þessar stóru 1077 tölur “ruglaðar” með “hashing SHA-256”, til að þjappa saman tölustöfunum í reikningsnúmerum og persónulegu lyklunum. Reikningsnúmerum er með þessum hætti þjappað niður í 34 stafa runu t.d. “ARB3uTPS5HJNsr3TgEY2LEvaanhackCm2E”.

 

Þess ber að geta að ef að þessi tækni er hökkuð eða það finnst veikleiki í þessari dulritunartækni er Auroracoin ekki aðal veikleikinn heldur öll önnur tækni sem nýtir dulritun t.d. öll bankaviðskipti, netbankar, símtöl og fjarskipti, gagnabankar og öll netsamskipti í heiminum.

 

Millifærslur

Auroracoin notar þessa þekktu dulritunartækni og samspil persónulegra lykla og reikningsnúmera á þann hátt að til að móttaka Auroracoin er hægt að fá sendar Auroracoin einingar á opinbert reikningsnúmer í veski viðtakanda. Til að senda Auroracoin einingar úr veski þarf hinsvegar að votta sendinguna með persónulega lyklinum, sem tryggir eignarhald Auroracoin.

 

Leikjafræði og námuvinnsla:

Tilgangur námuvinnslunnar er að halda utan um millifærslur og að tryggja að allir notendur hafi sama eintak af millifærslusögunni. Til að ná þessu markmiði er innbyggt í greiðslumiðlunarkerfið ákveðin samkeppni í reiknigetu ásamt utanumhaldi á millifærslum. Samkeppnin er þannig útfærð að greiðslumiðlunarnetið býr til þraut, sem gengur út á að örgjörvar tölva þurfa í sífellu að giska á lausn þrautarinnar, meðan þeir safna saman millifærslum frá síðustu blokk. Þegar ein tölvan finnur lausnina á þrautinni pakkar hún inn öllum millifærslum, sem hún hefur fundið og sendir svarið við þrautinni ásamt bokk með staðfestum millifærslum út á netið. Allir sem sinna greiðslumiðlun sjá að lausnin er fundin og staðfesta að svo sé. Tölvan sem fann lausnina fær verðlaun 12.5 AUR og allar þóknanir sem fylgdu með millifærslum frá síðustu blokk. Allar millifærslur sem þessi tölva skráði með lausninni á þrautinni eru nú orðin að nýjustu blokkinni í Auroracoin blokkarkeðjunni. Allar tölvur í netkerfinu hlaða niður þessu eintaki af nýjustu blokkinni og samkeppni hefst um að finna lausnina á næstu blokk.

 

Nánar um námuvinnslu:

Ef tvær tölvur finna á sama tíma lausn á þrautinni myndar greiðslumiðlunarkerfið tvær keðjur. Til að leysa þetta vandamál er samkeppni aftur lausnin, þar sem í greiðslumiðlunarkerfinu er innbyggt að rétta blokkarkeðjan er sú lengsta. Þetta þýðir að ef svona klofningur myndast varir hann einungis í skamma stund, þar sem nú hefst samkeppni milli tölvanna sem fylgja klofningskeðju A á móti klofningskeðju B. Sú tölva sem finnur næstu lausn tilgreinir hvort klofningskeðjan A eða B verður lengri og hver mun halda velli. Til dæmis ef næsta blokk sem finnst í greiðslumiðlunarkerfinu er í klofningskeðju B velur kerfið að klofningskeðja B sé rétta keðjan, þar sem hún er nú orðin lengri og allir aðilar í greiðslumiðlunarkerfinu eyða keðju A. Þess ber að geta að munurinn á keðju A og B var sennilega enginn, þ.e. allar sömu millifærslurnar voru í báðum keðjum.

 

Eini veikleiki greiðsludreifingarkerfisins er sá að ef einn aðili hefur yfir að ráða 51% af öllu reikniafli kerfisins, gæti sá hinn sami reynt að eyða sömu myntinni tvisvar eða bakfæra viðskipti. Þessi aðili gæti greitt fyrir vöru með Auroracoin, síðan notað allt reikniaflið sitt til að yfirtaka netkerfið og bakfæra sína færslu. Við að gera slíka árás á netkerfið býr þessi óprúttni aðili til klofningskeðju, þar sem það eru ekki sömu millifærslur í hans klofningskeðju m.v. almennu keðjuna. Því verður öllum samstundis ljóst að blokkarkeðju myntarinnar hefur verið breytt. Ef þetta kæmi upp myndi það að verðfella myntina samstundis, sem dregur stórlega úr högnunarmöguleikum af því að reyna slíkt svindl.

 

Lausnin á þessu vandamáli felst í verðlaunafénu sem námuvinnslan fær greitt. Því að ef að einhver hefur yfir að ráða 51% af reikniafli greiðslumiðlunarkerfisins fær hann líka helming alls verðlaunafjársins. Því er það í raun græðgi og persónulegur hagur viðkomadi að vinna heiðarlega, þar sem hann fær meiri ávinning af því að vera heiðarlegur en að reyna að svindla.

 

Að lokum þá er það einmitt líka leikjafræði og græðgi sem tryggir öryggi millfærslna í greiðsludreifingarkerfinu í réttu hlutfalli við verðmæti myntarinnar. Ástæðan er einföld, ef virði myntarinnar hækkar verður verðlauanféð verðmætara og samkeppni eykst um að ná færsluhirðingunni, þ.e. meira reikniafli er varið í að verja myntina. Því má með sanni segja að eftir því sem myntin er verðmætari því mun öruggari er hún.

 

Þóknanir við greiðsluhirðingu

Samkeppni um færsluhirðinguna er opin öllum, þar sem hver sem er getur hafið námuvinnslu og því mun samkeppni á þessum opna markaði halda þóknunum mjög lágum.

 

Hægt er að senda Auroracoin um greiðslumiðlunarkerfið án þess að greiða þóknun. Það eina sem gerist er að námuvinnsla forgangsraðar færslum í næstu blokk sem hafa greitt þóknun. Þegar samanlagðar færslur í eina blokk ná stæðrinni 1 Mb bíða umfram færslur eftir næstu blokk til að öðlast staðfestingu af greiðslumiðlunarnetinu. Þóknunin er því einungis nauðsynleg til að tryggja að millifærslan öðlist forgang og komist inn í næstu blokk. Þó svo greiða þurfi þóknanir fyrir millifærslur eru þær mjög lágar og eru óháðar upphæðinni sem er millifærð og kosta nú undir 0.001 úr AUR.

 

Önnur ástæða fyrir því að millifærslum fylgir kostnaður er til að koma í veg fyrir óþarfa millifærslur “spam” í greiðslumiðlunarnetinu. Ef kostnaður væri enginn við millifærslur mætti búast við að óprúttnir aðilar sæju hag sinn í því að senda fram og til baka tilgangslausar millifærslur einungis til að tefja netið og auka kostnað við námuvinnslu.

Comments are closed.